٧٤ یومِ جمہوریہ تے مھارو قبیلو۔تحریر از رفاقت چوہدری

74 ووں یوم جموریہ تے میرو قبیلو - اک جاہزو۔

  مھارا ملک بھارت نا انگریز کی غلامی تے نجات حاصل کرکے اک اذاد تے جمہوری ملک کا طورپر اج 74 سال ہوگیا ہیں، ان 74 سالاں ما ملک ما جہڑی ترقی ہوی ہے اس نا   اذادی کا امرت مہااتسو کے تحت درشایو جارہیو ہے  ہم اپنا قبیلہ بارے 74 سال کا سفر کو جاہزو لیاں، 

جمہوری بھارت کی 74  سال کی تاریخ مچ دلچسپ تے معنی خیز ہے، ذندہ قوماں کی اک نشانی یاہ وی ہے کہ وے ہر گزریا واہ سال کی اپنی کارکردگی تے سرگرمیاں کو جاہزو لیں، اپنو محاسبو کریں احتساب کا اس عمل نال اپنی غلطیاں تے نادانیاں کو پتو چل جاے پھاویں وے انفرادی ہویں یا اجتماعی تے اہندہ کی کسے وی بہتر حکمت عملی، پالیسی پروگرام یا روڈ میپ واسطے یوہ محاسبو مچ ضروری تے فاہدمند ثابت ہوے، ویسے وی قومی تے عالمی سطح پر جس تیزی نال تبدیلیں ارہی ہیں ان نا دیکھتاں یوہ ہور وی ضروری ہوجاے کہ ہم اپنا قبیلہ کی پل پل بدلتی اخلاقی قدراں، سماجی رویہ ،  روایات کی ٹہتی دہوار تے اس نال برادری پر پین الا اثرات کو جاہزو لیاں، 

 انسان نا اللہ تعالی نے اذاد پیدا کیو ہے، تے اس نا یوہ بنیادی اختیار دتو ہے کہ وہ اک واحد خالق کی بنای وی اس کاہنات تے اس کی عطا کی وی زندگی ما قدرت کا اصولاں کی پاسداری کرتاں جس طرح چاہیے اپنی زندگی گزار سکے، ور لکھاں سال کی انسانی تاریخ نے بے شمار تبدیلیں تے لہتا چڑھتا ما اپنی ضرورت کے مطابق گراں شہر تے بستیں بساہیں آگے چل کے ملک تے ریاست وجود ما اہیں ترقی کا اس سفر ما کہج آگے ہوکے طاقت ور ہوگیا تے کہج پچھے رہ کے کمزور ہوگیا، طاقت ور نے کمزور نا ہور کمزور کرن کی حرص رکھی اس نیت نال تاریخ ما جس نے پہلی بار دوجاء نا دبان کی کوشش کی وہ ہی وہ پہلو شخص، قوم ،ملک،ریاست یا سماج ہے جس نے قدرت کا سچا تے سچا اصولاں تے انحراف کرکے بدعت کی واہ چنگاری پیدا کی جس کی ساڑھ جدید جمہوری سماج ما وی ہزار کوششاں کے باوجود ویلے قویلے محسوس ہوتی رہ، اذادی اک انملی نعمت ہے جس ما تم تھارو اپنو ملک ہے، اس ما اپنو بنایو وو قانون تے ضابطہ ہیں یوہ اہین تے یہ ضابطہ ہر ملک،سماج تے ہر شہری کی مجموعی ترقی تے سالمیت واسطے ضروری ہیں کدے کسے ہور کو بنایو وو قانون تے ضابطہ تھارے پر مسلط ہیں تاں تم اذاد نی تے کدے سب کہج اپنو تے اپنا چنیاں واہ نماہنداں کو ہے تاں ایسو ہر شخص یا سماج اذاد ہے، ہون یاہ گل کہ اک اذاد ملک ما کہج طبقہ کس طریا ترقی کرگیا تے کہج کیوں  پسماندہ رہ گیا اس کو تعلق سماجی بیداری، سیاسی شعور ، انفرادی طبقاتی سوچ تے انتظامی عملداری نال ہے۔

   بھارت کا شہری خوش نصیب ہیں کہ انھاں نا عین اذادی کا دینہ چلکن کے موقعے ڈاکٹر بھیم راو امبیڈکر کی صورت ما اس دور کو دنیا کو عظیم ماہر قانون تے دانشور نصیب ہوو جس نے دنیا بھر کا کامیاب جمہوری ملکاں کا اہین کو مطالعو کرکے بھارت ملک واسطے ایسو زبردست تے بے مثال قانون بنایو جس کی کاے دوجی مثال سامنے نی، ہندوستانی سماج نا مچ پہلاں تے ذات پات کا نظام کی وجہ نال نابرابری کو سامنو کرنو پیو ہے، بابا امبیڈکر پسماندہ طبقات نال تعلق رکھیں تھا ان نا اس نابرابری کو بخوبی علم تھو اپنا اس علم مہارت تے تجربہ کی روشنی ما ان نے اہین ساز اسمبلی تے اہین کی ایسی جامع دستاویز منظور کرای جس ما پسماندہ طبقاں واسطے خاص حقوق تے مراعات رکھی گی ہیں، اس کی دو بڑی مثال شڈول کاسٹ تے شڈول ٹراہب نا حاصل حقوق ہیں۔ اذاد بھارت ما کہج پسماندہ طبقاں تے برادریاں نا یہ حقوق مچ پہلاں مل گیا تے کہج نا پنجاہ اک سال کی لمی جدوجہد تے زودیاں  کے بعد ملیا، مثال کا طور پر گجر بکروال برادری نا نبے کی دھای کا شروع ملیا جد شری ار۔وینکٹ رمن صدر تے شری چندر شیکھرملک کا وزیراعظم تھا، نبے تے پہلاں گجر بکروال قبیلہ کی تعلیمی تے سماجی حالت مچ پتلی تھی اکا دکا ملازم تے افسر تھا چاولاں ما بنڈ برابر، سول سیکٹریٹ ما کوے گجر نی تھو, ریاستی پولیس ما اک ادھ اعلی افسر گجر تھو، ڈویڑنل کمشنراں کا دفتراں ما کوے گجر نی تھو، طبقہ کو کوے کسے ضلع کو ڈپٹی کمشنر یا اعلی اداراں ما نی تھو، اکا دکا اپنی محنت نال ڈاکٹر تے انجینیر تھا، گجر بستیاں ما کاے بنیادی سہولت نی تھی، عام گجر بزار تے سرکاری دفتر ما پہلاں تے جاے ہی نی تھو فر کدے کسے مجبوری نال گیو تے اپنا لباس تے شرماے تھو گوجری ما گل کرن تے ڈرے تے جھکے تھو، قصہ یہ وی سنیا ہیں کہ گجر بستی ما جنگل کو راکھو اے تھو تے لوک ڈر نال واہ خزمت کریں تھا جہزی اج ڈی سی صاحب کی وی نی ہوتی، عام خانہ بدوش کو تے اس تے وی مندو حال تھو بچاں کی پڑھای کو کوے انتظام نی، مال پہاروں کسے بیماری یا افت سماوی کی نظر ہوجاہیں کاے رپورٹ نی کوے معاوضو نی، چھہ چھہ مہینہ ایسا علاقاں ما ریں جت راشن کی تقسیم کوے کوے انتظام نی، انتظامی سطع پر جتنا وی سالہ یا پنج سالہ پلان تے پروگرام بنیں ان ما ان کی کاے نمایندگی تے شمولیت نی، کل ملا کے ہم یوہ کہہ سکاں کہ اذاد بھارت کی تاریخ ما گجر بکروال سب دے ذیادہ نظرانداز ہوو وو طبقو تھو، نبے کی دھای ما شڈول ٹراہب کو درجو ملن کے بعد طبقہ کی حالت ما ہر سطع پر سدھار تے تبدیلی ای ور جس قدر تبدیلی تے ترقی کی امید تھی واہ نی ہوسکی اس کی اک وجہ سابقہ ریاست جموں و کشمیر کو خاص درجو تے ات کا بکھ قانون تھا جن نا بنیاد بنا کے اس دور کی حکومتاں نے سارا بھارت ما راہج شڈول ٹراہب قانون تے اس کے حاصل مراعات نا براہ راست جموں و کشمیر کا گجر بکروال پر عملایو نی بلکہ کدے ایس ار او 126 تے کدے 294 جیسا ریاستی قانون بناکے کہج اک مراعات دتیں ور وے جن نال کاے بڑی تبدیلی اتی ایسی ساری مراعات روک  رکھیی تھیں مثال کا طور پر اسمبلی ما شڈول ٹراہب واسطے سیٹ مخصوص نی ہون دتیں، پنجاہیت راج اداراں ما شڈول ٹراہب واسطے سیٹ مخصوص نی ہون دتیں، حقوق جنگلات نافذ نی ہون دتو، ایس سی ایس ٹی انٹروسیٹیز ایکٹ Scheduled Caste and Scheduled Tribe (Prevention of Atrocities) Act, 1989 نافذ نی ہون دتو تھو اسے طریا سرکاری ملازمت تے بھرتی عمل ما مچ سارا شعباں تے جموں کشمیر بنک جیسا اعلی اداراں ما شڈول ٹراہب طبقہ واسطے کاے واضع پالیسی نی تھی، بھرتی عمل تے پرموش کو روسثر اس طریا ترتیب دتو تھو کہ اعلی سطع کی آسامی شڈول ٹراہب کا حصہ ما سہل سہل نی اسکیں تھیں، اس طرح کی ہزاراں مثال ہیں جن تے تصدیق ہوے کہ اس طبقہ نال ماضی ما مچ زہادہ تعصب تے زیادتی ہوی ہے، ہون کدے پچھلہ دس تری سال کی تاریخ نا دیکھاں اس ما کسے قدر بیداری ای ہم کہہ سکاں کہ حد بندی کمیشن نے شڈول ٹراہب طبقہ واسطے نو اسمبلی سیٹ مخصوص کی ہیں، پنچاہیت راج اداراں ما مخصوص سیٹاں پر مھارا طبقہ کا ڈی ڈی سی ممبر، بی ڈی سی ممبر تے چیرمین چنن ہوا ہیں، فارسٹ راہیٹ ایکٹ جموں و کشمیر ما نافذ ہوگیو ہے،  چار پنج ضلعاں ما مھارا طبقہ کا ڈپٹی کمشنر ہیں، سیکٹریٹ ما پہلی دفعہ ڈاکٹر شاھد اقبال چودھری صاحب  انتظامی سیکٹری کا عہدہ پر فاہز ہیں اسے طریا ڈاہریکٹر ، سیکٹری، تحصیلدار تے زندگی کا مختلف شعباں ما مچ سارا اعلی افسر گجر بکروال قبیلہ کا ہیں، ایس سی ایس ٹی انٹروسیٹیز ایکٹ Scheduled Caste and Scheduled Tribe (Prevention of Atrocities) Act, 1989 نافذ ہوگیو ہے، خانہ بدوش نا ہجرت کے وقت سرکاری ٹراسپورٹ کی سہولت ملنی شروع ہوگی ہے، خانہ بدوش نا سمارٹ کارڈ بنا کے دتا جارہیا ہیں، ان کی بہکاں ما مناسب روشنی واسطے سولر لاہیٹ تے ٹنٹ دتا جارہیا ہیں، نوجواناں نا روزگار کے قابل بنان واسطے ہنر مندی کا تربیتی کورس شروع کیا گیا ہیں، ماڈل ٹراہیبل ولیج پر کم ہورہیو ہے، ۔۔۔۔۔۔۔

 ور اس کو مطلب یوہ ہرگز نی کہ مچ کہج ہوگیو بلکہ یوہ کہنو صحافتی دیانتداری ہوے گی کہ حالات  پہلاں تے بہتر  ہیں جت تک مساہل کو تعلق ہے وے ہر گزرتا دن کے نال بدھ رہیا ہیں، کل تک خانہ بدوش اپنی ٹہوک ما تھو اج جد فارسٹ ایکٹ نافذ ہوو وہی خانہ بدوش کسے شہر قصبہ ما آڑا یا خالی ویران جاء ما ترپال ہیٹھ عیال سمیت بیٹھووو محنت مزدوری کرے لگو اس کو وے پھیڈ پہاروں نی رہیا جن نا لے کے وہ ٹہوک جاے تھو،اس کی زندگی قدیم انسان تے بدتر ہے کسے نا شک ہے تے وہ اک کڑاکا کی تھنڈ ما جہلم کا اڑاھ ما نیلی ترپال ہیٹھ ککو ہوکے بیٹھا واہ خانہ بدوش نا دیکھ لیے 

قسطوں میں خودکشی کا مزہ ہم سے پوچھیے

 ہون یا تے حکومت ان پچھلی حکومتاں ما شامل عہدیداراں نا عدالت ما کھلا کرے جن نے فارسٹ راہیٹ ایکٹ وقت پر نافذ نی کیو تے خانہ بدوش اپنو سب کہج لٹا چکیو یاہ پھر ایسا خانہ بدوشاں نا شیپ یونٹ دے کے ان کا نقصان کی بھرپای کرے کہ وے دوبارہ ٹہوکاں ما جاسکیں، شڈول ٹراہب ملازم  واسطے قانون کے تحت پورا ملک ما پرموشن کو کوٹو ہے جس پر عمل ہوے، ور سابقہ ریاست جموں و کشمیر ما جد تک ترقی کی یاہ سہولت بحال رہی کہج لوک پرموٹ ہوکے اعلی عہداں تک بجیا پھر اک شخص جہڑا اس ویلے جمہوریت کا اک ستون ما کرتا دھرتا  تھا تے ریٹاہر منٹ کے بعد سیاست ما آکے مچ اچا ایوان ما بیٹھا ہیں نے جموں و کشمیر کی خصوصی حثیت کو بہانو لا کے ریزرویشن ان پرموشن ختم کردتی جہڑی اج تک بحال نی ہوسکی، گجر بکروال نا سوچنو چاہیے کہ کدے  وے اپنا عہدہ تے  اختیار  نا  استمعال کرکے ایسو کرسکیں تم وی وقت ان پر اپنا حق کو استمعال کرکے دس سکیں تھا کہ کتنے بییں سو ہیں ور اک جٹ نہ ہون کی وجہ نال ایسو نہ کرسکیا ایسا موقعہ  فر اہیں گا فر ویلو کھنج نہ جاے  اس واسطے مچ ضروری ہے کہ گجر بکروال قبیلہ ما سماجی بیداری تے سیاسی شعور پیدا کرن کی ضرورت ہے اؤر یاہی واہ دشا جس پر پچتھہر سال ما کدے کاے سنجیدہ توجہ نی دتی گی، تاریخ کا شیشہ ما جس قوم قبیلہ  نے وی اپنو حلیو تکیو وہ جانے کہ جد تک سماجی تے سیاسی بیداری پیدا نی ہوسے تدھ تک لوک  اذاد ملک کا اذاد شہری ہون کے باوجود مچ محروم تے محکوم ریں، اج ہم اذادی کا امرت مہااتسو کے تحت اذادی کی نعمت کی گل کراں لگا ہم نا مچ ساراں نے جلسہ جلوساں ما پھیڑ بٹلی کرن واسطے استمعال کیو، کدے تھاری سوچ غریب نا ہوتی تم ذہنی غلام نہ ہوتا تم کدے ایراں غیراں واسطے بٹلہ نہ ہوتا ظاہر ہے کہ مھارا طبقہ ما سماجی تے سیاسی شعور کو مچ زہادہ فقدان ہے پچھلہ چھہتر سال ما مھارا کرتا دھرتاں نے بڑی دوڑا تای کی ور جاہزہ  تے پتو چلے کہ کسے اک شعبہ ما وی دسن لاہق کامیابی نی ملی۔ اور اس کی اک بڑی وجہ یا وی رہی کہ پچتھہر سال ہم اپنی محرومیاں کا ذمہ دار باقی سماج نا سمجھتا رہیا جد کہ اصل میر جعفر تے میر صادق مھارے اپنے اندر ہیں۔

کون طاقوں میں رہا کون سررہ گزر

شہر کے سارے چراغوں کو ہوا جانتی ہے۔

 کہج اک قاعدین نا چھوڑ کے باقی ان سارا کی وے مصروفیات صرف اپناں اپ نا فاہدو پچان واسطے تھیں ان ما کدے واقعی قاہدانہ صلاحیت ہوتی تاں ان واسطے کرن کو سب تے بڑو تے پہلو کم علمی،سماجی تے سیاسی بیداری تھو،  لوک جد صیح معنی ما جاگ جاتا باقی کم وے خود کرلیتا، ور افسوس کہ ات دیا ہیٹھ نھہرا الی مچ ساری زندہ مثال ہیں۔پچھلی سطراں ما ہم نے جن ترقیاں کو ذکر کیو وے with the passage of time چھتہر سال ما ہونی ہی تھیں اور وے سارا اعلی افسر اپنی محنت نال بنیا کسے قیادت کا چمکار نال نی، قیادت واہ ہونی چاہیے جس نا منزل کی بھوم ہوے جن کو اپنا لوکاں کی ترقی واسطے کوے روڈ میپ ہوے، ایسا سیاستدانا کو قال رہیو جن کو کوے ویڑن ہوے،اکا دکا کے بغیر سارا پنج سالہ ڈنگ ٹپای کرتا رہیا۔اور اج نہ ان کو کوے قاہدانہ مقام ہے نہ مھاری حالت بدلی۔

  ہم تو ڈوبے ہیں صنم

 تم کو بھی لے ڈوبیں گے

74  سال کا جموری سفر کے بعد وی کدے کسے طبقہ کی مانگ بجلی،پانی،سڑک تے راشن ہوے تاں یوہ کہیو جاسکے کہ اسے رفتار نال شڈول ٹراہب نا سماج کا دوجا طبقاں کی برابری کرن ما ہور چھتہر سال یا اک صدی لگے گی، مکتی گل یاہ کہ اس طبقہ کا ہر شخص نا انفرادی طور پر اپنو محاسبو کرن کی ضرورت ہے، سماجی خدمت گزاری کو واویلو کرن الاں نا خلوص نیت نال سماجی و سیاسی بیداری پر کم کرنو ہوے گو، وے جہڑا حضرات و خواتین زراہع ابلاغ کا شعباں نال جڑیا ہیں ان نا بیباک صحافتی رویو اختیار کرنو پے گو، گوجری صحافت کی چھتہر سالہ تاریخ ذیادہ تر خوشامدی کی چغلی کھاتی نظراے، ہون وقت اگیو ہے کہ برادری کا ذمہ داراں تے سوال جواب کیو جاے۔عوامی نماہنداں تے اعلی افسراں تے اخلاقی حداں ما رہ کے تحقیق پر مبنی سخت تے کھرا سوال کیا جاہیں، حقیقی اذادی اس ویلے ہے جد اک عام زمیندار تے بے نام خانہ بدوش اپنا نماہندہ نا جکا تے پکڑ کے کہہ سکے تیں میرے واسطے کہ کیو! 

آہ کو چاہیے اِک عُمر اثر ہونے تک​

کون جیتا ہے تری زُلف کے سر ہونے تک​

دنیا کا مختلف ملکاں تے قوماں کا عروج و زوال کی مستند  تاریخ مھارے سامنے ہے کہ ترقی راتو رات نی ہوجاتی اس واسطے بڑا پاپڑ بیلنا ہیں بڑی کھرڑی رگڑنی ہیں کج پیرا میٹر ہیں جن پر چلن واسطے اک مثبت محاشرتی رویہ نا پیدا کرن کی ضرورت ہے اور یوہ مثبت محاشرتی رویو ادیب کی کوشش کے بغیر ممکن نی نال نال  اک طویل مدتی روڈ میپ کی ضرورت ہے کہ ہر شعبہ زندگی لوک سرکاری امداد پر اسرو کرن کے بجاے اپنا طور پر کوشش کریں دن رات چوبی گھنٹہ وچوں اک گھنٹو اجتماعی فلاح کے واسطے وقف کریں۔

اس ما شک نی کہ جس کم ما سرکاری پرستی حاصل ہوے وہ کہٹ مدت ما اعلی پیمانہ پر کیو جاسکے ور تم جانے کہ

کسے وی علاقہ یا سماج کا کسے طبقہ کی تعمیر و ترقی واسطے سرکاری فنڈ اس علاقہ یا طبقہ کی ابادی کے مطابق دتا جاہیں، 

چھتہر سال بعد وی ہم دوجا کا دسیا واہ ڈاٹا کا محتاج ہان  ہم یقین نال نی کہہ سکتا کہ مھاری ابادی کتنی ہے، اک چنگو کم ہوو کہ قباہیلی محکمہ نے اک سروے کرای ور واہ سروے صرف خانہ بدوش سیزنل ماہیگریشن کرن الاں واسطے تھی اس ما دسیو گیو کہ سیزنل ماہیگریشن الاں کی ابادی چھ لکھ بارہ ہزار ہے ور عام اندازو ہے ک تعداد اس تے ذیادہ ہے مچ سارا گنتی ما نی آیا ، ضرورت اس گل کی ہے کہ کوے ایسو لائہ عمل بنایو جاے جس کے تحث  گھر گھر جاکے مردم شماری کی جاے،  کدے کاے تحصیل رقبہ کا لحاظ نال زیادہ بڑی ہوی فر وی یوہ کم ترے مہینہ کے اندر ہوسکے اور اس طریا ہم نا معلوم ہوجاے گو کہ مھاری اصل ابادی کتنی ہے۔ اور اہندہ اسے ڈاٹا نا ہم ہما جہت مقاصد واسطے استمعال کرسکاں گا۔

اج نفسا نفسی کی ہوا چہل رہی ہے ہر اک اپنی شناخت نکھیڑ کے دسن ما مصروف ہے ایسا ما جت ادیب پر مچ بڑی ذمہ داری اگی ہے کہ وہ ادیبانہ طریقہ نال دلاہل کے نال برادری کا ان مساہل بارے لکھے ات قبیلہ کا سیاسی رہنماں کی وی اخلاقی ذمہ داری ہے کہ وے برادری کی اس حوالہ نال رینمای کریں ات یاہ گل کہنی مناسب لگے کہ مہہم شروع کرنو، میدان ما انو اک گل ہے،  کسے مہم نا توڑ لانو دوجی گل ہے۔ بقول جناب محمد اثراہیل اثر۔

یاری لانی اثر  آسان پھاویں 

جانے کوے کوے توڑ نبھانیاں نا