فرید بجاڑ شخصيت تے کارنامہ

فرید احمد بجاڑ اک روشن ناں۔۔ دور دراز تے غریب گھرانہ توں لے غے چیف انجنیئر تک۔۔۔۔۔۔ 

یاد رہ  جے فرید احمد بجاڑضلع پونچھ غی تحصیل مہنڈھر غا اک دور دراز گراں کا لابن مانھ سال ۱۹۶۳ مانھ مولوی ولی محمد بجاڑ غے کہر پیدا ہوا مولوی ولی محمد بجاڑ مچ سادہ طبیعت نیک سیرت اور خوش اخلاق شخصیت غا مالک ہون غے نال نال  صوم و صلوۃ غا پابند وی تھا۔ جس وجہ سنگ کہر مانھ دینی ماحول غی رونق برقرار تھی عڑوس پڑوس غا بچاں نانھ  قرآن غو درس دیں تھا اور فرید صاحب نے وی قرآنی تعلیم ولد محترم کو لوں حاصل کی دنیاوی تعلیم غو وی بے حد شوق تھو جس شوق نانھ پورا کرتا مانھ اناں پنجویں جماعت تک غی تعلیم مہلہ غا اک اسکول  گورنمنٹ پرائمری اسکول دھڑاں کالابن مانھ حاصل کی بعد مانھ چھٹی جماعت تیں دسویں جماعت تک گورنمنٹ ہائی اسکول چھترال ماں تعلیم حاصل کی اپنی میٹرک مکلمل  کرن توں بعد پی یو سی ٹی۔ ڈی سی واسطے گورنمنٹ بوائز ہاہر سیکنڈری اسکول مہنڈھر چلے گیا جت پوری محنت لگن سنگ تعلیم غا بارہ سال مکلمل کرلیا  اور اسے دوران سال ۱۹۸۲ مانھ انجنیئرنگ ٹیسٹ پاس کر غے REC سرینگر مانھ انجنیئر ٹریننگ واسطے منتخب ہو گیا۔ مگر با بقول ان غے  اس وقت ان غی مالی حالت کافی کمزور تھی مگر کیں نانھ ُ" ہمت مرداں مدد خدا " ہمت نی ہاری والدین نے فرید صاحب غا داخلہ واسطے انتھک کوشش کی جس مانھ اناں غا دادا محترم مرحوم جناب مولوی جمالدین صاحب غو وی بڑو  ہتھ رہیو۔ بل آخر ساراں دعائیاں تے کاوشاں رنگ لالو تے انا داخلو ہوگیو ۔ اس دوران  اناں نے کئ  مرتبہ سرینگر تیں کہر تک غو سفر مغل رستہ غے ذریعہ پیدل وی کیو اور بڑی کٹھنائیاں تے مشکلاں غو سامنو کرتا رہیا اس ویلا غیں مچ ساریں تلخ یاد اناں سنگ جڑی وی ہیں جن وچوں اک قابلِ ذکر ہے دسیں اک دفہ والدہ محترمہ نے اپنا نک غو لونگ دتو کہ بیچ غے اپنا خرچہ غو ا نتظام کریو تے وہ لونگ دوران سفر ہی گم گیو۔ تے لونگ نہ لبن غی وجہ سنگ مچ رکھی تے پریشان ہو یا یو ان غی زندگی بے حد دکھی واقع تھو۔ اور اس دوران اک ادھ مرتبہ خرچہ واسطے زمین غو ٹوٹو وی بیچنو پیو۔اناں کٹھن تےدشوار پینڈا توں لنگ غے چوہاں براں غی مدت مانھ پوری محنت تے لگن نال انجنیئرنگ ٹریننگ مکلمل کرلی اور ۷ مارچ ۱۹۸۸ مانھ وے باطور Mechanical JEتعنیات ہوگیا .والدین واسطے یو اک بڑا ہی اعزاز غو ویلو تھو جد سنیو کی فرید صا حب JE تعنات ہوگیا ہیں تے والدین غی خوشی غی کائے حد نہ رہی۔اور اس طرح اناں نے اپنی سرکاری خدمت غاسفر غو باقاعدہ آغازکرلیو اور وقتاً فوقتاً ترقی حاصل کرتا کرتا جموں وکشمیر غا مختلف ضلعاں ماں باطور ڈی وی رہیا نومبر ۲۰۱۸ مانھ اناں غو چیف انجنیئر غا عہدہ ور فائز ہونو پوری قوم واسطے اک اعزازی غی گل تھی ۔ اسطرح اناںھ پنچ سال تک باطور چیف انجنیئر کم کیو۔ اپنی خدمات غے دوران الله پاک غا فضل وکرم غےنال صرف اور صرف مفاحمتاں غاتحفہ ہی کھٹیا۔ بل آخر پوری ایمانداری اور دیانت داری  غےنال اپنو یو سفر مکمل کرتا مانھ اج یعنی، ۳۱ اکست ۲۰۲۳ باروز ویر وار باخیر آفیت محکمہ مکینیکل انجنیئرنگ توں باطور چیف انجینئر سبکدوشی حاصل کرغےمحکمہ نانھ آخری سلام پیش کیو۔۔ہم سب غی دعا ہے الله پاک پائی جان غی عمر مانھ برکت کرے اور اناں غو سایو تا دیر مہارا سراں ور قائم تے دائم رکھے اس شعر نال اجازت منگو۔۔ 

ل۔۔۔ لکھ مبارک باد تمنا سفر ملازمت غو کیو اج تمام تمنے

خدمت لوکاں بے  شمار  کی  کیو  روشن قوم غو نام تمنے

عہدہ چیف تیں سبکدوش ہو یا کیو محکمہ نانھ سلام تمنے

برکت عمرمانھ رب دلشاد کرے نوا سفر غو کیو احتمام تمنے

تھارو خادم۔۔۔۔۔ شاہنواز دلشاد بجاڑ۔۔۔